АН-ынхан шуудайнд хийсэн үхрийн эвэр шиг хоёр тийшээ харж суун хөлөө жийлцэн хэрэлдэж байх зуур эрх баригчид хуулийн цоорхойг ашиглан авлигач гишүүдийнхээ толгойг илэн ялаас хөнгөлж, ардчиллын  13-ын нэг, Ардын баатар, Нийслэлийн Засаг дарга асан Э.Бат-Үүлд ял өгсөн нь олон нийтийн дунд шүүхийнхэн ялгарласан шийдвэр гаргаж байна гэсэн маргаан дэгдээв. АН-ынхан гэнэт ухаан оров уу гэлтэй гишүүд дэмжигчид нь бид нэг удирдлагатай, нэг л тамгатай болмоор байна хэмээн жагсаж,  УИХ дахь АН-ын бүлэг чуулганы хуралдааныг Э.Бат-Үүлд ял оноосныг эсэргүүцэн орхин гарч, гишүүд нь энд тэндээс эсэргүүцэл илэрхийлэхээс өөрийг хийж чадахгүй байна. Нийслэлийн олон дарга нар дотроос Э.Бат-Үүл шиг иргэдийн төлөө хийсэн ажилтай хэлэх үгтэй хүн олдоно гэдэг юу л бол.  Иргэдийнхээ төлөө гэсэн сэтгэл зүрхтэй ажиллавал ямарч ажлыг урагшлуулж болохыг харуулсан жилүүд түүнийг удирдаж байхад л эхэлсэн. Гэхдээ хэтэрсэн улстөржилт, дампуурсан тендерийн маргаан, нэгнээ дэмжин ажиллаж чаддаггүй, уялдаа холбоогүй хэдэн байгууллагыг нь цэгцэнд нь оруулах гэсэн түүний зүтгэлийг  сонгуулийн дүн нурааж хийсэн ажлаа ч бүрэн гүйцээж чадаагүй ажлаа өгсөн. Түүнийг залгамжилж нийслэлийн Засаг даргаар томилогдсон дарга нар гэр хорооллын дахин төлөвлөлтийг гацаанд оруулсан. Төрийн ажил залгамж халаатай, чиний миний нам гэж улстөрждөггүй байсан бол гэр хорооллын дахин төлөвлөлтөөс болж байргүй болсон иргэд бухимдаж энэ олон жилийг өнгөрөөхгүй байсан.  Түүний хүүгийн компани буруугүй нь тогтоогдсон байхад  прокурорын яллах дүгнэлт гарч түүнд ял оноосон нь хачирхалтай. Шүүхээс  хялбаршуулсан журмаар шийдэх боломжгүй байна. Хялбаршуулсан журам нь гэмт хэрэг хийснээ хүлээн зөвшөөрсөн, мөнгөн төлбөрөөр хохирлыг барагдуулсан гэх мэт таван үндэслэлээр шийдэгддэг гэсэн үгийг давтаж хэлээд суух. Гэмт хэрэг үйлдээгүй, гүтгэж байна хэмээн эхнээсээ эцсээ хүртэл тэмцсэн түүний тэмцэл хүч түрсэн шийдвэр, хэдэн дарга нарын үзэгний үзүүрээр шийдэгдээд өнгөрөх гэж байна. АН-ынхан ядахдаа амь нэгтэй байж, хүчтэй сөрөг хүчин байсан бол намынхаа гишүүдийн  төлөө хэлэх үгтэй, хэрэгжүүлэх ажилтай байх байсан юм. Ардчиллынханы 90 оны тэмцэл улстөрийн хувьд ухрах шатандаа орсон байхад хүртэл нэгдэн нийлж чадахгүй байгаа нь тэдний албан тушаал эрх мэдэлд хэр дуртайг харуулж байна. Ядаж ардчиллын 13-ын нэгээ улстөрийн золиос болгохгүйн төлөө хөдлөхгүй бол улстөрийн тавцангаас төдийгүй иргэд олон нийтийн итгэл, сэтгэлийг алдах гээд байна.