МАН-ынхан 30 дахь их хурлаа хийж авлигатай тэмцэнэ гэдгээ албан ёсоор зарлаж намын дүрмэндээ ч заалтуудыг нь  орууллаа. Удирдлагууд нь МАН-ын гишүүн авлига, албан тушаалын гэмт хэрэгт холбогдвол намын гишүүнээс түдгэлзүүлнэ. Шүүхийн шийдвэрээр ял авсан бол намын гишүүнээс хасагдсанд тооцно. Улс төрийн дэмжлэг үзүүлэхгүй хэмээн зарлалаа. Авлигатай тэмцэх үндэсний чуулган хийж төрийн үйлчилгээг цахимжуулж, хүний оролцоог багасган, тендер зарласан нэрээр төрийн ажлыг гацаадаг тогтолцоог өөрчилнө. УИХ-ын гишүүд, улс төр бизнесийн нам дамжсан бүлэглэлийнхэн хамтарч өөрсдийн түлхүүрдсэн компани нь тендерт ялахгүй бол шүүхэд хандан хэдэн сар жилээр үргэлжилсэн маргаан үүсгэж нийтийн эрх ашгийг хохироодог байдлыг хална. Тендерийн шаардлага хангасан компанийг цахим технологиор сонгодог тогтолцоонд шилжүүлнэ гэж мэдэгдэв. Cахилга хариуцлагыг дээшлүүлэх үүднээс төрийн албыг цахимжуулж удирдлага, албан тушаалтны хүнд суртлаас шалтгаалдаг олон тооны зөвшөөрлийг хүчингүй болгоно гэдгээ хэлж байна. Иргэд, аж ахуйн нэгжийн хувьд хүсэн хүлээсэн өдрийн бодол шөнийн зүүд болсон мөрөөдлийг нь яриад байгаа боловч хэрэг дээрээ хэрэгжилт нь удаан ярихаас хэтрэхгүй, хүнд суртал нь ихэссэн үү л гэхээс багасаагүй л байна.Нэг авлигачийг нөгөөгөөр нь солиод ямарч нэмэргүй л байна.  Авлига өгсөн авсныг нь аль алиныг нь шийтгэдэг бус авлига нэхсэнийг нь шийтгэдэг болчихвол олон асуудлын зангилгаа тайлагдах гээд байгаа боловч ах намынхан арай өөр байр суурьтай байгаа бололтой. Тэдний хувьд авлига авч өгч байгаа хүнийг нь бус хөрс суурийг нь өөрчилж шинэчилнэ гэж ярьж байна. Юу тарина түүнийгээ л хураана гэдэг  шиг авлигачид нь авлигачдыг л төрүүлдэг тогтолцоо Монгол оронд үйлчлээд удсан. Хөрс ургамал ярьсаар хэр удахыг бүү мэд. Ямартаа ч тендерийн хорооны гишүүд гэсэн 10 хувь ярьсан нөхдүүдийн мөнгө саах боломжийг хумина л гэж найдья. Энгийн иргэд нэг асуудал шийдүүлэх гэхээр төрийн байгууллагууд нь шийдвэрийг нь хэдэн сараар хойшлуулдаг, урдуур нь өөр компани зүтгүүлж үнэнээс хол зөрүүтэй  тайлбар хэлнэ. Аль эсвэл танил тал найз нөхдөдөө давуу эрх олгож, танилгүй, мөнгөгүй  бол та холхон бай гэх нь холгүй байдгаас л тэр. Авлига нэхсэн албан тушаалтныг нь хэлэхээр адилхан танай компани шийтгүүлнэ гээд байхаар яаж ч эрүүл хөрс, тогтолцоо бүрдэх юм бүү мэд. Намынх нь, нэг фракцийнх нь гишүүд авлига авсан бол толгойг нь илээд торгосон, хилээр гарах эрхийг хориглосон, төрийн албанд томилогдох эрхийг нь түтгэлзүүлсэн болоод л орхиж байна. Татвар төлөгчдийн мөнгийг үрсэн, түмэн олныг талцуулсны шагнал гэж ойлгож болохоор шийтгэдэг сонирхолтой хуулиа өөрчилнө гэдэг ч одоо бол хүчин төгөлдөр үйлчилсэн хэвээр байна.  Төрийн хүнд суртлыг багасгах цахим сонголтууд нь зөв байж,   хакер энэ тэр гэж зовлон тоочихгүй шиг төрийн ажил урагшилдаг, түмэн олон нь  шударга нийгэмд амьдардаг болохсон. Авлигатай тэмцэх тэмцлийн гацаанаасаа төрийнхөн нь хэр удаж гарахыг хэлэхэд хэцүү л юм.