Авлига хээл хахуул Монгол Улсад цэцэглэн хөгжиж төрийн удирдах албан тушаал хашиж байсан нөхдүүд 12 их наяд төгрөгийг хумсалж, хулгайлж, халаасласныг Авлигатай тэмцэх газар нь аль хэдий тогтоож хууль хяналтын байгууллагуудад шилжүүлсэн. Гэтэл оймсондоо, шүүгээндээ, дансандаа нуусан хэдэн тэрбум төгрөгөө дарж, идсэн уусан нь баримт нотлогоогоор илрээд байхад хүртэл улсын төсвөөс хулгайлсан мөнгөө төлөхгүй хойш сууцгааж байгаа гэнэ.Тэдний хувьд иргэдийн өдөр шөнөгүй хөдөлмөрлөж олсон мөнгөнөөс бүрдсэн төсвийн мөнгө өөрсдийнх нь халаасны наргиж цэнгэх мөнгө бололтой юм. Хуулийн цоорхой нь ч энд үйлчилж улсад учруулсан хохирлоо төлчих юм бол цэвэрхэн мултарчих бололтой юм. Энгийн иргэд хэрэгт орвол хэдэн жилийн ял авдаг бол иргэдийнхээ төсвийн мөнгөнөөс хулгайлагсад хил гарахаа хязгаарлуулж, ажлаа өгөх  төдий л болоод өнгөрнө. Хамгийн сүүлд “Эрдэнэс Монгол” ХХК-ийн гүйцэтгэх захирал Д.Хаянхярваа хээл хахуулийн хэрэгт холбогдсон ч суллагдсан. Харин үүнийг  авлигачдын цувааныхан  гэж нэг хэсэг нь үзэж байгаа бол нөгөө хэсэг нь  албан тушаалын дайнд ялагдсан, авсан өгсөн нь тодорхой ажлаа өгөөд л асуудал дуусна гэцгээж байна.Ямартаа ч идэж уухаа урдаа барьдаггүй эх орноо гэсэн сэтгэлтэй нэгнээр төрийн албаа бүрдүүлбэл түмэн олон амгалан амьдрах байх. Тэр цаг хэзээ ирэх нь тодорхойгүй. Ах намынхан төдийгүй ардчиллынхан ч албан тушаалын дайнд мордсон. Албан тушаалын дайны түйвээнээр авлигачид нь илэрсээр л байна. Тооцох хариуцлага нь тодорхой,  иддэг уудаг нь багасаж байж эх орон нь хөгжиж цэцэглэх биз ээ.