Кибер аюулгүй байдлын тухай хуулийн төсөл УИХ-ын чуулганы хуралдаанаар хэлэлцэгдэн батлагдах гэж байна. Хууль хэлэлцэгдэх явцад гаднын сайтанд Монгол улсын 2300 иргэний мэдээллийг зарах зар тавигдаж холбогдох байгууллагууд шалгалт зохион байгуулж байсан. Гэтэл цагдаагийн байгууллагын хоёр сайтыг хакердсан мэдээлэл гарлаа. Монгол улс кибер аюулгүй байдалдаа зайлшгүй анхаарах шаардлагатай байгааг харуулсан. Шинээр байгуулагдсан яам нь иргэдийн гар утас, компьютерын программ хангамжаас эхлээд техник хэрэгслийн засвар үйлчилгээ, төрийн болон хувийн хэвшлийн байгууллагууд иргэдэд үйлчилгээ үзүүлэхдээ авсан мэдээ мэдээллээ хэрхэн хамгаалж хадгалж байна вэ гэсэн олон асуудлыг сайтар шинжлэн судалж нарийн төлөвлөгөөтэй шуурхай ажиллах хэрэгтэй байна.  Хаан банкны харилцагчид их хэмжээний мөнгө данснаасаа алдаж интернет банк нээгээгүй байхад үл таних нэгэн данс нээж, өөр хүний данс руу мөнгө шилжүүлсэн байхад хариуцсан байгууллага нь иргэд өөрсдөө анхаарал болгоомжтой байх хэрэгтэй гэж хэлээд суугаад байж болохгүй. Иргэн, аж ахуйн нэгж төрийн байгууллагууд хамтран цахим орчны аюулгүй байдалд анхаарч, ард иргэдээ амар тайван амьдрах нөхцөл бололцоог бүрдүүлэхийн төлөө хамтран ажиллах шаардлагатай байна.   Иргэн таны гар утас компьютераас алдсан мэдээлэл гэр бүлийг тань эрсдэлд оруулах бол, иргэдийн нэгдсэн мэдээлэл алдагдвал эх орны аюулгүй байдал, иргэдийн эрх эрх чөлөө гэж ярих ч  хэрэггүй болно. Ярилцаад суугаад байх биш яаралтай арга хэмжээ авч ажилладаг болох хэрэгтэй байна.