Монголын улстөрчид эрх мэдэл, албан тушаалд хүрмэгцээ хөрөнгө орлого нь огцом нэмэгдэж, иргэдийн татварын мөнгөнөөс идсэн уусан гэсэн хэл ам тасардаггүй. Улстөрчид энэ бүлэглэл, тэр улстөрч намайг унагах гэж байна хэмээн гомдоллодог байсан бол харин өдгөө гаднын сэтгүүлчдийн эрэн сурвалжлах баг Монголын улстөрчдийн “но” –г дэлгэсэн баримтууд дэлгэж эхэллээ. Хэвлэлээр цацагдах болсон “но”-той  мэдээллийн эхний эзэн нь  Ерөнхий сайд асан С.Батболдын оффшор бүсэд бий болгосон эд хөрөнгө. Түүний хуулийн зөвлөх Лондон дахь тансаг зэрэглэлийн хаусыг хуулийн дагуу худалдаж авсан гэж мэдэгдэж байгаа ч түүний санхүүг шалгахаар Сингапур, АНУ-ын шүүхэд түүнийг дуудсан, уул уурхайгаар хөрөнгөжсөн гэж сэтгүүлчдийн баримтад өгүүлжээ.Олон улсын эрэн сурвалжлах сэтгүүлчдийн баг 35 орны удирдагч, 300 гаруй төрийн өндөр албан тушаалтантай холбоотой баримтаас ердөө дөрөвхөн хувийг нь ил зарласан гэж байгаа бөгөөд цаана нь Монголын хэдэн улстөрчдийн ямар баримтууд дэлгэгдэх эсэхийг нь одоогоор хэлэхэд хэцүү. Монголоос хоёр улстөрчийн нэр олон нийтэд ил болсон гэсэн ч нэгийнх нь нэр тодорхойгүй л байна. Улстөрчид энд тэнд хөрөнгө нууж, ил далд идэж уувал энэ мэтээр хилийн чанадад ч шүүх цагдаад дуудагдаж  эх орныхоо нэрийг цагаанаар бус хараар дуудуулах нь цаг хугацааны асуудал болоод байна.