Дэлхийн эрүүл мэндийн байгууллагаас 100 мянган хүнд тохиолдох байдлаар нь улс орнуудыг жагсаахад манай улс сүрьеэгийн тархалтаараа Номхон далайн баруун эргийн 37 орноос дөрөвдүгээрт орж байгаа аж. Харин манай улсын халдварт өвчний нас баралтаараа энэ өвчин нэгдүгээрт орж байна. Бүртгэгдэж буй тооноос харахад манай улсад жил бүр 4000 гаруй хүн уг өвчнөөр өвчилж байна гэсэн статистик бий. Ингээд бодохоор гурван сая гаруйхан хүнтэй манай улсын хувьд энэ нь маш өндөр үзүүлэлт юм.

Сүрьеэ нь амьсгалын замаар хүнээс хүнд дамжин халдварладаг нянгийн гаралтай халдварт өвчин. Гэхдээ халдвар авсан тохиолдлын  90 хувь нь өвчлөхгүй байдаг аж. Учир нь уг халдвар хүний уушгинд орж, капсул бүхий бүрхүүл үүсгэн оршдог байна. Тухайн хүн бие махбодын хувьд эрүүл, дархлаа сайн байвал халдвар гадагш илрэхгүй ч амьдралынхаа туршид тээсээр байдаг гэнэ. Харин хоол тэжээлийн дутагдалд орох, ядрах зэрэг шалтгаануудаас унтаа байдалд байсан нянгууд сэргэж өвчлөл үүсгэдэг байна. Ялангуяа, ХДХВ-ийн үед сүрьеэ нь нас баралтын гол шалтгаан болдог байна.