Монгол Улсад жилд дунджаар сүрьеэгийн 4000 тохиолдол шинээр бүртгэгддэг байна. Тэр дундаа 18-24 насны залуучуудын дунд эл өвчин түгээмэл байгаа нь аюулын харанга дэлдэх болжээ. Ядуурал бол сүрьеэгийн хамгийн том эрсдэлт хүчин зүйлийн нэг байдаг аж. Хоол тэжээлийн дутагдал, дархлалтын тогтолцоо сул байх нь сүрьеэгээр өвчлөх эрсдлийг нэмэгдүүлэх гол хүчин зүйл болдгийг эмч нар анхааруулж байна. Дэлхий дахинд оношлогдож буй сүрьеэгийн бүх шинэ тохиолдлын 1/4 нь хоол тэжээлийн дутагдлын шалтгаан байдаг гэнэ.

Монгол Улсад бүртгэгдсэн сүрьеэтэй өвчитнүүдийн 50 хувь нь ажилгүй, 70 хувь нь амьжиргааны баталгаажих түвшин доогуур орлоготой байдгийг судлаачид тогтоожээ.

Мөн шилжилт хөдөлгөөн ч мөн энэ өвчлөлд нөлөөлдөг гэнэ. Өөрөөр хэлбэл, шилжилт хөдөлгөөн нэмэгдэхийн хэрээр сүрьеэгийн тохиолдлыг олж илрүүлэхгүй байх эрсдэл нэмэгддэг тухай мэргэжилтнүүд анхааруулах болов. Орон гэргүй хүмүүс ихэвчлэн бичиг баримтгүй, эсвэл бичиг баримтын зөрчилтэй байдаг нь сүрьеэгийн тусламж үйлчилгээнд хамрагдахад саад учруулж байгаа бөгөөд энэ хирээр сүрьеэгийн халдвар бусдад тараасаар байдаг аж.

Орон гэргүй сүрьеэтэй өвчтөний эмчилгээ таслалт нь бусдад халдвараа тарааж, олон эмэнд тэсвэртэй сүрьеэ үүсэх нөхцөл боломжийг бий болгодог гэнэ.

Түүнчлэн сүүлийн үед дэлхий нийтийн шүдний өвчин болоод байгаа тамхидалт ч мөн энэ өвчинд хамааралтай. Тамхины хэрэглээ нь сүрьеэгээр өвчлөх эрсдэлийг 2-2.5 дахин нэмэгдүүлдэг байна. Сүрьеэтэй өвчтөнг тамхинаас татгалзуулах, тамхи хэрэглэдэггүй сүрьеэтэй өвчтөнг дам тамхидалтад өртөхөөс сэргийлэх замаар сүрьеэгийн эмчилгээний үр дүнг сайжруулах боломжтой байдаг тул иргэн та эрүүл мэнддээ анхаарч, 10 хар хорын нэг тамхи, архинаас аль болох татгалзахыг эрдэмтэд анхааруулж байна.