Бусдын өмнөөс фэйсбүүк хаяг нээн /хуурамч ассount үүсгэж/ буруугаар ашиглах зөрчил нэмэгдсэн байна. Тиймээс Кибер гэмт хэрэгтэй тэмцэх газарт хандана гэдгээ УИХ-ын гишүүн Х. Золжаргал мэдэгджээ. УИХ-ын гишүүний зургийг ашигласан баталгаажуулалтын цэнхэр тэмдэг бүхий, олон дагагчтай фэйбүүк хаягаар ташаа мэдээлэл нийтэлсэн. Тиймээс хуулийн байгууллагад хандана гэж мэдэгдсний дараа нэрийг нь сольсон байна. Цахим аюулгүй байдалд анхаарах цаг болсон. Зориудаар бусдын нэр хүндэд халдсан гэмт хэрэг гэж үзэж байгаа учир шалгуулна гэдгээ мэдэгдсэн байна. Өмнө нь ч сонгуулийн үеэр нэр дэвшигчдийн хаягийг дууриан давхар хаяг нээж ташаа мэдээлэл цацсан асуудал сөхөгдөж фэйбүүк рүү шалгуулах хүсэлт явуулсан ч шийдэхгүй байсаар сонгууль дууссан тохиолдол бий. БНСУ гэхэд сошиал хаягаар бусдыг дээрэлхсэн хүүхдийг дээд сургуульд элсүүлэхгүй байх шийдвэр гаргасан. Цаашид цахим ертөнцөд бусдын хувийн орон зай руу халдсан, цахим хаягаар бусдыг илт худлаар гүтгэн доромжилсон, ташаа мэдээлэл түгээсэн, цахим халдлага хийсэн хүмүүст тооцох хариуцлагыг нэмэгдүүлэх шаардлагатай гэж байнга ярьдаг ч хуулийнхан асуудлыг шийдвэрлэж чадахгүй байгаагаас нөхцөл байдал улам бүр дордсоор байгаа юм. Төртэй, хуультай улсад хэн нэгний нэр хүндэд хэн ч хууль бусаар халдах ёсгүй.