Энэ жилийн улсын баяр наадмаар Баянхонгор нутгийн хүү, улсын начин Э.Батмагнай, Сүхбаатар аймгийн арслан Н.Өсөхбаяр нар төв цэнгэлдэхэд үзэгч олныг сууж босгон, цэнхэр дэлгэцээр наадмаа үзсэн Монголын ард түмнийг суудал дээр өндөлзүүлсэн сайхан барилдааныг үзүүллээ. Үзүүр, түрүүнд үлдсэн бөхчүүд унасан нэгэн нь инээгээд тахимаа өгдөг, зэрэгцээд хөтлөлцөөд алхдаг монголын бөхийн сайхан ёсыг сэргээн сануулсан нь хамгийн бахархалтай байлаа. Олон ч наадмаар зүлэг ногоон дэмжээнээ бөхчүүдээ уйлаад зодог тайлах, унаад маргалдаж байхыг харсан ард түмэн зөв жишгийг спортоор дамжуулж залууст түгээсэн сайхан бөхчүүдээрээ энэ л өдрүүдэд бахархаж сэтгэлийн цагаан ерөөлөө харамжгүй хайрлаж, хайр хишгээ түгээв. Олны итгэлийг дааж, түмний хайр хүндэтгэлийг хүлээсэн арслан, гарьд хоёр маань олон жил сайхан барилдаж, цолоо ахиулж, үзэгч түмнээ өндөлдүүлсэн барилдааныг үргэлж үзүүлэхийг ерөөл өргөе. Монголын бөхийн хийморь дээшээ байг.