Онцгой байдлын байгууллагад энэ онд 79 усны ослын дуудлага мэдээлэл бүртгэгдснээс 65 иргэн амь насаа алдсан. Усны ослоос нийт 11 хүний амь насыг авран хамгаалжээ.Баяр наадмын өдрүүдэд 24 усны ослоор нас барсан. Иргэдэд удаа дараа сэрэмжлүүлсээр байтал хүүхдийг хараа хяналтгүй орхин, архи согтууруулах ундаа хэрэглэсэн үедээ, ус их байхад гатлах гэж зүтгэснээс живж амь насаа эрсдүүлсэн байна. Хамгийн сүүлд Баян-Өлгий аймгийн Ногоон нуурт гэр бүлийн зургаан хүний тав нь усанд живсэн байна. Иймд Онцгой байдлын байгууллагаас дараах зөвлөмж, сэрэмжлүүлгийг хүргэж байна.

• Өөрийн сайн мэдэхгүй гол, нуур, усанд орохгүй, сэлэхгүй байх;
• Цаг агаарын сэрэмжлүүлэг мэдээллийг хүлээн авч аялах, амрах зугаалахдаа ашиглах;
• Тээврийн хэрэгсэл болон ердийн хөсгөөр баталгаагүй гүүр, гарц гарамгүй газраар ус гатлахгүй байх;
• Хүүхдийг гол усны эрэг дагуу тоглуулахгүй байх, хүүхдэд тавих хараа, хяналтаа сайжруулах, стандартын бус хийлдэг завь, гудас, тоглоом зэргийг ашиглахгүй байх;
• Согтууруулах ундаа хэрэглэсэн үедээ гол усанд орохгүй байх;
• Мэргэжлийн байгууллагын заавар зөвлөгөөг хүлээн авч дагах, шаардлагыг биелүүлэх;
• Малчид, ард иргэд голын эрэг хөвөө дагуу бууж, суурьшихгүй байхыг анхааруулж байна.